Gërçaliu transferohet në Rumani

Futbollisti Ronald Gërçaliu karrierën do ta vazhdojë në Rumani. 27-vjeçari i lindur në Tiranë, të premten ka firmosur për gjashtë muaj me skuadrën Universitatea Cluj. Ish-reprezentuesi i Austrisë deri më tani ka luajtur për Erzgebirge Auen e Bundesliga 2 të Gjermanisë.

Këtë edicion ka regjistruar vetëm një paraqitje. “Kam vendosur të vij në Universitatea Cluj pasi kam dëgjuar se liga e Rumanisë është shumë e mirë dhe mua më pëlqejnë sfidat. Qëllimi kryesor është të ndihmoj skuadrën të mbetet në kategorinë e parë”, ka thënë Gërçaliu për sajtin zyrtar të skuadrës së tij të re.

Ai luan si mbrojtës i krahut të majtë. Gërçaliu karrierë ka bërë kryesisht në Austri për skuadra si Sturm Graz, Salzburg, Austria Vjenë e Neustadt. Për përfaqësuesen e Austrisë ka luajtur 14 herë, së fundi në vitin 2009. U.Cluj është i parafundit në klasifikim me 16 pikë të mbledhura.