Arsimtarët pa kontratë kolektive

Kontrata kolektive për punëtorët e arsimit, është dashur të nënshkruhet në fund të muajit shtator të këtij viti. Por kjo nuk ka ndodhur ende. Zyrtarët e Ministrisë së Arsimit thonë se kjo shtyrje është bërë që ky proces të mos ketë ndikim në fushatën elektorale që është mbajtur gjatë muajit tetor dhe është përsëritur në nëntor.

Ndërkohë, në MASHT kanë premtuar se kontratat me mësimdhënësit do të nënshkruhen pas zgjedhjeve të balotazhit. Që nga viti 2005, kur edhe ka skaduar afati kontratës së vjetër kolektive, punëtorët e arsimit vazhdojnë të punojnë me po atë kontratë. Ndërkohë, ende nuk është nënshkruar kontrata e re kolektive.

Lutfi Mani, kryetar i Komisionit për kontratën kolektive në Sindikatën e Bashkuar të Arsimit, ka theksuar se kontrata është e gatshme, por do të nënshkruhet pas zgjedhjeve. Sipas tij, arsyeja e mosnënshkrimit të kontratës, deri më tani është se Qeveria e Kosovës, ka refuzuar që t’u japë nga katër paga mësuesve që pensionohen…(Tribuna).