Ndërtimi i shtëpive në Medvegjë sipas kërkesave prioritare

Personi i autorizuar për komunën e Medvegjës lidhur me konkursin e Fondit Humanitar për ndërtimin e 100 shtëpive në komunat Preshevë, Bujanoc dhe Medvegjë, zotëriu Fehmi Beha sot ka bërë të ditur se 100 shtëpi nuk do të ndërtohen vetëm në komunën e Medvegjës por në tërë territorin e Luginës së Preshevës. Sipas tij, projekti i ndërtimit do të zgjasë 5 vite, konkursi tashmë është publikuar dhe ftohen të interesuarit që të konkurojnë në përputhje me kushtet e konkursit.

Përparësi për ndërtimin e shtëpive siç kemi mësuar do të kenë familjet skamnore të cilat jetojnë me të gjithë anëtarët e familjes në komunën e Medvegjës dhe ato familje të cilat dëshirojnë të kthehen, po ashtu, me të gjithë anëtarët.

“Qëllimi i këtij aksioni humanitar i cili njëherit ka karakter kombëtar është parandalimi i shpërnguljes së shqiptarëve nga Lugina e Preshevës dhe mundësimi i kthimit të sigurtë të atyre të cilët dëshirojnë të kthehen me familje të jetojnë, punojnë dhe veprojnë në Luginë”, tha z. Beha.

Ka spekulime joformale se flitet për numrin e shtëpive që mund të ndërtohen në Medvegjë, mirëpo deri më tani nuk ka të dhëna të sakta për këtë numër, me siguri se ndërtimi do të varet nga kërkesat e qytetarëve dhe nga plotësimi i kushteve të konkursit.

“Në qoftë se dikush nga aplikuesit nuk selektohet në rrethin e parë me siguri se brenda afatit pesëvjeçar do të trajtohen kërkesat e të gjithë atyre të cilët i plotësojnë kushtet për ndërtim. Shpresoj se kërkesat e qytetarëve do të jenë të sinqerta dhe se ata të cilët përfitojnë nga ky fond të mos keqpërdorin ndihmën”, tha z. Beha.

Për të interesuarit, dokumentacioni i nevojshëm për aplikim sipas konkursit të publikuar në Medvegja.net Web Portal, duhet të dorëzohet deri më datën 10 dhjetor 2013, në zyrën në Shtëpinë e Kulturës./Shkruan: Fidan Kosumi-medvegja.net/