Ah Kosova pluraliste – rapsodi moderne (satirike)

Nga Bilall Haliti – Ndërroi stina , ndërroi moti
nuk shkoi mundi kot së koti
dhe Kosova dje moniste
sot na doli pluraliste.

Këtij monizmit i doli boja
iu lag baroti – mbaroi loja !
Pluralizmit i erdhi radha
vetëm njërit s’ i shitet fjala .

Dje me gërshërë e me censurë
sot na doli me kulturë ,
majtas , djathtas – dert nuk ka
le të ruhet tradita , pra !
U ndërrua këmisha , u ndërrua gëzofi ,
kameleon dhe filozofi !
Në shesh dolën shumë parti ,
u bë vendi lesh e li .

Se si bëhet politika
le të mësojë dhe Amerika !
Me shumë fytyra doli mileti ,
nuk ka dert pse s’ bëhet shteti ,
me rëndësi është pushteti –
është pushteti , është kuleta ,
është gradimi , është paleta !
Nisi gara për të mbarë
kush të zë vendin e parë .

Nga një start fillestar
u bënë parti- o për pazar ,
për pazar e për eksport –
mungon mjeti për transport !
Po nuk vajti , medet, e mbara ,
në shesh doli e palara .

S’ pat nevojë për dëshmitar –
nuk pat mall- o për pazar .
Mallin fals s’ e ha pazari ,
u bë hop pa u k’ cy’ gardhi !
Kjo Evropa me përvojë
nuk pranon të vihet në lojë !
Ajo matë me kandar të vet ,
nuk bën hile – po matë drejt.
Peshon vlerën , kualitetin ,
qet në shesh marifetin !
Dushk për gogla s’ mund t’ pranojë
s’ mundet kush – o ta mashtrojë.

Satirike

Karrieristi

Herë në një parti ,
herë në partinë tjetër,
lufton për karrierë –
stili, ai i vjetër !

Shtiret demokrat
e parlamentar,
në qytet e fshat
do të jetë i parë !

Në pushtet po të ishte,
po të ishte i parë,
defetizëm s’ do të kishte –
puna do të shkonte mbarë !

Në odë është i pari,
ku hahet e pihet,
nuk e di qyqari
pas bregu çka fshihet !

1) Poezia u botua në ” Bujku ” më 24 gusht 1996 .