Kadriu premton ndihma për gratë e Krushës së Vogël

Gjilan – Kryetari i Aleancës për Ardhmërinë e Kosovës – Dega në Gjilan Rexhep Kadriu, i shoqëruar nga nënkryetarja e AAK-së në Gjilan Mevlyde Zejnullahu dhe sekretarja organizative e AGK-së në Gjilan Xhylie Hajdari, kanë pritur në një vizitë gratë kryefamiljare të Krushës së Vogël.

Ato, me strukturën e AAK-së në Gjilan, kanë diskutuar për hallet dhe kërkesat e tyre, kërkesa këto të cila kanë gjetur mbështetje tek kryetari Kadriu. Gratë e Krushës së Vogël, kanë thënë se me ndihmën që ato marrin nga qeveria, është e pamundur t`i mbulojnë kërkesat elementare të familjeve të tyre, prandaj janë shprehur se si kërkesë prioritare kanë mundësinë e shkollimit të fëmijëve të tyre.

Kryetari Kadriu, ka thënë se është i gatshëm t`i mbështesë kërkesat e këtyre grave dhe është shprehur se AAK në Gjilan, duke u bazuar në fuqitë e veta, do të jetë gjithmonë e gatshme të ofrojë përkrahje këtyre grave, përgjegjësia e të cilave është shumëfish më e madhe.

Gratë e Krushës së Vogël, janë ndier të nderuara dhe janë shprehur mirënjohëse për pritjen e bërë nga kryetari Rexhep Kadriu dhe pjesa tjetër e strukturës së Aleancës në Gjilan./rajonipress/