PDK ka hapësirë për të gjitha femrat e përkushtuara

Gjilan – Se Partia Demokratike e Kosovës, është parti e përgjegjshme dhe më seriozja në vend, flet ardhja në PDK e njerëzve serioz dhe të përkushtuar kudo në shërbim të qytetarëve dhe komunës së Gjilanit, ka thënë kryetari i degës së PDK-së Zenun Pajaziti në takimin me strukturat e Gruas Demokratike të Kosovës në Gjilan, si dhe aktiviste e gra të shumta të komunës së Gjilanit.

“U mblodhëm sot në këtë numër të konsiderueshëm të pjesëmarrjes së zonjave e zonjushave, që bashkë t’i urojmë mirëseardhje në PDK e ta inkurajojmë për angazhim të mëtutjeshëm politike këshilltaren komunale Leonora Morina Bunjaku, e cila vendosi të bëhet pjesë e familjes së madhe të PDK-së. Në emër të PDK-së ju ftoj të gjithave të jeni pjesë aktive e angazhimeve tona politike në vazhdimësi, për faktin se ne kemi motiv për punët e shkëlqyeshme dhe të suksesshme për komunën dhe kemi ambicie për zhvillime edhe më të hovshme për qytetin dhe vendin, e që qytetin e Gjilanit ta bëjmë qytet Evropian “ka thënë Pajaziti.

Pajaziti ka thënë se ne duam që në aktivitetet tona të përditshme të kemi e t’i kultivojmë edhe më shumë vlerat e nënave e motrave tona, të cilat edhe në rrethanat e vështira për ne si popull arritën t’i sfidojnë pengesat dhe të japin kontributin e tyre në të mirë të vendit.

“Jemi të riorganizuar bashkërisht për fitore të reja me të gjithë aktivistët e shumtë të PDK-së që ishin pjesë e ekipeve fituese në shumë palë zgjedhje të PDK-së “ka shtuar Pajaziti.

Ndërsa këshilltarja komunale Leonora Morina Bunjaku, e cila tanimë është bashkuar në PDK ka thënë se duhet të angazhohemi dhe të mbështesim pjesëmarrjen dhe perspektivën e femrave në proceset e vendimmarrjes , sepse roli i femrave në shoqëri është i pazëvendësueshëm dhe duke pasur parasysh se PDK gjithnjë e më shumë po tregon angazhim në të mirë të mirëqenies së tërësishme të qytetarëve, e cila padyshim se lidhet ngushtë me zhvillimin e shoqërisë në të gjitha sferat për të krijuar një të ardhme premtuese për qytetarët, kam arritur besimin dhe bindjen të bëhem pjesë e PDK-së”

Në këtë takim të organizuar nga kryetari i degës së PDK-së në Gjilan Zenun Pajaziti kanë folur edhe kryetarja e GDK-së Shukrije Rapuca dhe deputetja e Kuvendit të Kosovës Salihe Mustafa./rajonipress/