Financohet rruga Qarakoc – Koretin

Gjilan – Kryetari i komunës së Kamenicës, Shaip Surdulli, të martën ka pritur Isa Berishën, Menaxher i infrastrukturës rrugore për rajonin e Gjilanit. Surdulli dhe Isa Berisha e kanë diskutuar dhe analizuar si një projekt shumë domethënës projektin e nënshkruar mes Shaip Surdullit e Fehmi Mujotës për ndërtimin e rrugës Qarakoc – Koretin në vlerë të 540 mijë eurove.

Me këtë rast Shaip Surdulli dhe Isa Berisha kanë nënshkruar marrëveshje për bashkëfinancim të projektit për ndërtimin e rrugës Qarakoc- Koretin, mes Ministrisë së Infrastrukturës dhe Komunës së Kamenicës.

Isa Berisha, Menaxher i infrastrukturës rrugore për rajonin e Gjilanit tha se projekti është dy vjeçar. Vlera e parashikuar e projektit është 540,000.00 €. Ministria e Infrastrukturës do të financojë këtë projekt me 475,200.00 €, ose 88 % e vlerës së projektit.

Ministria e Infrastrukturës nga buxheti i vitit 2013 do t’i sigurojë 41,992.00 €, ndërsa nga buxheti i vitit 2014 do t’i sigurojë 433,208.00 €.

Kurse, Komuna e Kamenicës do të financojë projektin me 64,800.00 € ose 12 % e vlerës së projektit.

Kryetari i komunës së Kamenicës, Shaip Surdulli, ka falënderuar Ministrinë e Infrastrukturës, për këtë investim kapital, me të cilin projekt do të përfitojnë banorët e disa fshatrave të cilat do të lidhën me qendrën komunale Kamenicën./rajonipress/