Të metat e pushtetarëve sa tragjike aq edhe komike

Nga Nuhi Ismajli – Përgjigje në shkrimin e Nuhi Nuhiut, me titull: “Zhurmuesi Nuhi Ismajli”, www.rajonipress.com, më 11 qershor 2013.

Pushteti aktual gjilanas, në mos për tjetër, bile sa i përket mënyrës së komunikimit me qytetarët, mund të lavdërohet për disponimin që ua krijon atyre. Letrat e tyre, të shkruara me një shqipe të mjerë, që dëshmojnë injorancën e paparë të pushtetarëve tanë, përpjekja për t’ua mëveshur të metat e veta të tjerëve dhe për t’i akuzuar etj., për qytetarët, sa janë tragjike, për atë se kush i udhëheq, janë po aq edhe komike, sa edhe në momentin më dëshpërues, nuk mund të të mos shqyejnë gazit.

Reagimi i Nuhi Nuhiut: “Zhurmuesi Nuhi Ismajli”, sigurisht, është një reagim i tillë që, qytetarëve gjilanas, do t’ua nxisë gazin për një kohë jo të shkurtër.

Pse mund të thuhet kështu?

Pse, Nuhi Nuhiu, vetë filloi të na përqeshte, por kur ne i treguam pasqyrën, ai u shikua në pasqyrë e nuk e pa veten siç është. Narcisi e pushtetari, Nuhi Nuhiu, që nuk e pa si duhet veten në pasqyrë, tha: “…u këqyra në pasqyre nuk isha ashtu siç më kishe përshkruar.”! Pra, pushtetari ynë shikohet në pasqyrë e nuk e shikon dot fytyrën e tij të vërtetë! Na thotë, pastaj, se atë, si e ka krijuar Zoti, nuk duhet të përqeshet: “Edhe pse zoti na ka krijuar me këtë pamjen fizike, fajtor nuk jemi pse kemi këtë pamje.” Posi! A vlen kjo veç për njerëzit, apo edhe për pushtetarët gjilanas, të tipit të Nuhi Nuhiut?! Si e paska të drejtën Nuhi Nuhiu të na përqeshë, kurse ne nuk paskemi të drejtë t’ia kthejmë me të njëjtën monedhë?!

Pse, Nuhi Nuhiu, nuk kupton asgjë nga ankimet e qytetarëve, kurse ankesat e tyre i quan “zhurmë” , ndërsa ata vetë “zhurmues”.

Pse, Nuhi Nuhiu pushtetar, gënjen faqe botës, me mburrje e pa asnjë ngurrim, si të ishte duke bërë një gjë shumë fisnike. P. sh., ndër të tjera, thotë:

1. “Pra nuk është e vërtet, se në drejtorin e buxhetit e financave t`i ke marr vërtetim, por ke dërguar në shkollë një certifikatë nga kadastri i cili asgjë nuk dëshmon. Ky është një dokument- certifikatë se nuk posedon paluejtshmeri në Gjilan” – kurse, unë, Nuhi Ismajli, sipas pushtetarëve gjilanas, qytetari “i pa adresë”, “ilegal”, “i padisiplinuar”, “papunëtor” e “shkelës i ligjit”, pas mjaft peripecive, si edhe shumë qytetarë të tjerë, mora hiç më pak se dy vërtetime për kryerjen e obligimeve tatimore, më 23 prill 2013, njërin nga të cilët, ndonjë ditë më vonë, ia dorëzova organizatës ku punoj.

2. “T`i nuk ke adresë të banimit, si e dëshmon t`i adresën tende. Me një fjalë t`i je ilegal në qytetin e Gjilanit” – kurse unë, Nuhi Ismajli, sipas pushtetarëve gjilanas, qytetari “pa adresë”, “ilegal”, “i padisiplinuar”, “shkelës i ligjit” e “papunëtor”, jam lindur në fshatin Terziaj të komunës së Gjilanit; jetoj në Gjilan, me pak ndërprerje, nga viti 1968; punoj si profesor i Letërsisë e Gjuhës Shqipe, qe gati katër dhjetëvjetësha; banoj në qendër të qytetit, në pronën time, të cilën e kam blerë me mjetet e mia personale dhe për këtë e kam dokumentin përkatës; jam banor I LIRË i qytetit, që më pëlqen të ec rrugëve të këtij qyteti, të rri në lokalet e ndryshme të tij e edhe në qendër, në hotelin “Kristal”, por që, sipas pushtetarëve “të dashur”, “humanistë”, “popullorë” gjilanas, konsiderohem e synohet të trajtohem: “i pa adresë”, “ilegal”, “qytetar i padisiplinuar”, “shkelës i ligjit”…

3. Nuk respekton ligjin dhe shfrytëzon të mirat e këtij vendi “pa punuar”, si një “ilegal”, “qytetar pa adresë”, “shkelës ligji”, “i padisiplinuar”, që flet kundër pushtetit etj. apo, cituar sipas pushtetarit, Nuhi Nuhiut: “Sa i përket asaj se t`i respekton ligjin, si nuk të vije turp ta thuash atë, kur t`i para se të merresh me çdo drejtori të komunës dhe ta harxhosh atë pak energji e forcë që e paska, ishte më mirë qe ta dorëzosh planin e punës në shkollën ku punon, edhe t`i mbash orët e kujdestarisë e te ju shpjegosh nxënësve lidhur me edukatën, kulturën,etj. Mirëpo këto nuk i bënë , nuk ke kohë për tu marrë me punët e tua, ke të drejtë si qytetar i pa adresë të merresh edhe me qeverisjen komunale vetëm atëherë kur respekton ligjin.

Pra pas kryerjes se obligimit ligjor për punën që e bënë në institucionin, për çka edhe merr pagë nga taksapaguesit e Republikës së Kosovës e jo të ndonjë shteti fqinjë… pasi nuk respekton ligjin e punës ” – kur unë, Nuhi Ismajli, kurrë nuk jam akuzuar, as dënuar për ndonjë vepër jonjerëzore dhe të dënueshme; kur unë, Nuhi Ismajli, nuk kam asnjë mungesë në vendin e punës dhe ku, askush , bash askush, dhe asnjëherë, me asnjë lloj standardi, nuk mund të më thotë se nuk punon sa duhet e si duhet; kur unë, Nuhi Ismajli, e zotëroj mirë profesionin tim e nuk jam një qyqar që dëshmoj punën e planin e punës me letra, siç kërkohet në një shoqëri të prapambetur, po me planin në kokë, si dëshmohet në çdo vend të përparuar; kur ndjej forcë e obligim të merrem edhe me brengat e qytetarëve e të metat e pushtetarëve injorantë e të pandërgjegjshëm. E të tjera. E të tjera.

Nuhi Nuhiu, një pushtetar tipik gjilanas, që punën në sektorin e tij e bën dobët dhe pa asnjë avancim modern, që flet publikisht, pa i disponuar as të dhënat elementare për ato që shkruan dhe që gënjen e përgojon qytetarët, nuk mund të mos shprehë edhe dëshirën e tij të sëmurë, sa qytetarët t’i trajtojë si “ilegal”, “të padisiplinuar” etj. dhe t’i hedhë edhe në gjyq. Për mua kjo nuk është çudi, as e panjohur. I njoh pushtetarët gjilanas, të tipit të Nuhi Nuhiut, “aftësitë” dhe lakmitë e sëmura të tyre. Ata kanë shkelë të drejtat e qytetarëve dhe, madje, kanë shkruar edhe vetë vendime në vend të gjyqit!

Pushtetarët gjilanas i kanë drejtorët e komisionet disiplinore dhe le të shkruajnë edhe vetë vendime gjyqësore me të cilat dënojnë qytetarët e pafajshëm dhe le t’i shkelin me forcën e pushtetit të drejtat qytetare! Le t’i dënojnë ata që po guxojnë të flasin kundër të metave të pushtetarëve “të dashur”, “humanistë”,“popullor” gjilanas! Le ta dënojnë edhe autorin e këtij shkrimi, i cili s’ua var fare torbën udhëheqësve injorantë, papunëtorë e të pafytyrë, sepse s’është frikësuar, as frikësohet dot, po reagon publikisht kundër të metave të tyre!

Sepse kështu e ndjen për obligim qytetar, e jo se do të bëjë zhurmë. Zhurmë bën tjetërkush, po pushteti gjilanas nuk ka vesh për të dëgjuar, as drejtori të aftë për ta luftuar. Mbase, shqisa e pushtetarëve tanë nuk dëgjon fare zhurmën, që dëmton rëndë trurin dhe zemrën e njeriut, po vetëm zhurmën që ua ngacmon karrigen!

Le të kërcënohet pushteti gjilanas, sa të dojë, dhe le ta dënojë sa të dojë edhe autorin e këtij shkrimi, i cili po flet e do të flasë haptazi gjithnjë, jo se është badihavxhi e po ka qejf, po pse kështu po na detyrojnë sjelljet dhe veprimet e pushtetarëve gjilanas, të cilët nuk po na durojnë dot si “qytetar pa adresë”, “ilegal”, “papunëtorë”, “të padisiplinuar”, “shkelës të ligjit”….!!!