Kundërshtojnë KEK-un, nuk e dorëzojnë trafon

Gjilan – Lagja “Arbëria” në Gjilan që përfshinë mbi 400 shtëpi ka reaguar ashpër ndaj veprimit të KEK-ut për ta marrë trafon e vendosur në këtë lagje. Vebih Berisha banor tha se trafoja është donacion i huaj dhe nuk do të lejohet të merret dhunshëm nga KEK-u.

Banorët e lagjes “Arbëria” në Gjilan kanë reaguar shpejt të enjten derisa punëtorët e KEK-ut po bënin përpjekje që ta marrin trafon nga kjo lagje. Qindra qytetarë janë tubuar në mbrojtje të trafosë së tyre e cila sipas banorëve është dhënë donacion nga organizatat e huaja dhe nuk është pronë e KEK-ut.

Vebih Berisha banorë tha për rajonipress se nuk e kanë ndërmend ta lejojnë KEK-un që ta plaçkit trafon.”Ne kemi paguar mbi 10 mijë marka gjermane për vendin ku tani ndodhet trafoja dhe kjo trafo është e 1000 KV ndërsa KEK-u e ka sjellur një të 530 KV që është dallim shumë i madh” tha Berisha.

Edhe Bejtullah Zymberi banor është i befasuar me mënyrën se si KEK-u tenton të marrë trafot që janë të vendosura në lagjet e mëdha.”KEK-u edhe ashtu po na plaçkit në fatura, tash po dëshiron që tinëzisht të marrë trafon. Kjo nuk do të tolerohet dhe ne do ta mbrojmë trafon me çdo çmim” tha i revoltuar ky banorë.

Kurse Ramadan Ahmeti drejtor i njësisë së KEK-ut në Gjilan tha për rajonipress se KEK-u vetëm po zëvendëson trafot. “Aty ku ka nevojë për fuqi më të madhe po i zëvendësojmë dhe nuk po bëjmë kurrfarë rrotullimi tjetër. Krejt kjo është në interes të konsumatorëve sepse humbjet janë më të pakta” tha Ahmeti./rajonipress/