Muçibaba mbetet në terr

Gjilan – Fshati Muçibab sipas Idriz Rexhepit është shkëputur nga rryma për shkak të borxheve që kanë 10 familjet e mbetura atje. Rexhepi apelon te KEK-u dhe institucionet komunale që të kenë mirëkuptim për banorët e brezit kufitar.

KEK-u nuk i ka kursyer familjet e brezit kufitarë. Një aksion i KEK-ut ka lënë në terr mbi 10 familje të këtij fshati. Banorët e brezit kufitarë nuk e mohojnë borxhin që kanë ndaj KEK-ut , por thonë se ata e kanë të vështirë të paguajnë shpenzimet e KEK-ut.

Idriz Rexhepi banor i pakët në Muçibab tha për rajonipress se mbi 10 familje janë një kohë të gjatë në terr. “Atyre u është ndërprerë rryma sepse kanë borxhe dikush nga 400 e deri në 500 euro. Por ato familje nuk e kontestojnë borxhin, por kërkojnë mirëkuptim nga Qeveria ose Komuna e Gjilanit që të kenë mirëkuptim për familjet e brezit kufitarë” tha Rexhepi.

Rexhepi tha se nëse edhe rryma elektrike u mungon këtyre familjeve që kanë vendosur të jetojnë afër kufirit me Serbinë atëherë atyre nuk u mbetet gjë tjetër pos ta braktisin vendlindjen.

Por , Ramadan Ahmeti drejtor në njësinë e KEK-ut në Gjilan tha se ato familje në Muçibab janë shkyçur për shkak të borxhit që kanë.”Neve na vije keq që ato familje jetojnë me ndihma sociale, por KEK-u nuk është organizatë humanitare dhe nuk mund t`i falë borxhet. Ndoshta Qeveria apo institucionet tjera duhet të mendojnë për formën e ndihmës që mund tu bëjnë këtyre banorëve, por jo KEK-u” tha Ahmeti.

Idriz Rexhepi ndërkaq thotë se shumica e familjeve të mbetura në Muçibab, Borincë e Lipovicë jetojnë nga ndihmat sociale. Këto familje disa herë kanë kërkuar ndihma sidomos në fushën e bujqësisë dhe rregullim të infrastrukturës si formë e vetme për të parandaluar shpërnguljen./rajonipress/