Ramadani: Partitë politike nuk guxojnë ta politizojnë rastin e Zhegrës

Gjilan – Shukrije Ramadani kryetare e këshillit organizativ për shpalljen e Zhegrës Komunë tha për rajonipress se ajo nuk i përkrah partitë politike në Zhegër që po bëjnë presion dhe realisht po e promovojnë forcën e tyre. Në momentin që kërkesa e zhegranëve politizohet unë tërhiqem tha Ramadani.

Shukrije Ramadani e cila mori timonin që kërkesat e zhegranëve për tu bërë komunë t`i bëjë realitet nuk është ndier mirë me kërcënimet e partive politike dhe kërkesat e tyre, që nëse Zhegra nuk bëhet komunë do të bojkotojnë zgjedhjet.

Ramadani tha për rajonipress se realisht nuk është mirë që kërkesa e zhegranëve të vonohet nga ana e Qeverisë.”Ne si këshill tani do ta dorëzojmë planin strategjik sepse në fillim ka qenë pak i mangët dhe tani jemi duke e plotësuar. Ky planë ka rreth 20 faqe dhe po përgatitet nga ekspertët vendor” tha Ramadani.

Ramadani është e shqetësuar që kërkesa e zhegranëve po politizohet.”Partitë politike nuk guxojnë të politizojnë rastin e Zhegrës sepse e vetmja mundësi që ne të arrijmë deri tek finalja është rruga institucionale. Hapat e partive politike në Zhegër për thirrjet e tyre për bojkot totalisht janë të gabueshme dhe unë personalisht jam kundër tyre” tha Ramadani.

Ramadani tha se partitë politike po bëjnë promovim të forcës së tyre. “Ne nuk e kemi nisur këtë punë për të fituar vota për ndonjë parti politike. Ky do të ishte gabimi më i madh dhe nëse vazhdohet kështu unë tërhiqem nga pozita e koordinatores” tha Ramadani./rajonipress/