Propozimi i Pacollit, opsion i mirë për Trepçën

Trepçën nuk duhet ta përcjellë fati i njëjtë i ndërmarrjeve që janë privatizuar deri më tani në Kosovë. Gjiganti metalurgjik, sipas njohësve të ekonomisë duhet të trajtohet më ndryshe. Vetë termi privatizim në Kosovë sipas tyre nuk është referencë për storie suksesi.

Ndërkaq, ideja e kreut të AKR-së, njëherësh zëvendëskryeministër i Kosovës, Behgjet Pacolli, që për Trepçën të vendosin ekspertët e Agjencisë së Participimit që duhet të themelohet enkas për t’u marrë me këtë problem e shihet si një nga alternativat e mundshme.

Megjithatë, kërkohet që të hartohen projekte dhe të mblidhen grupe ekspertësh për të ofruar edhe opsione tjera se çfarë duhet të ndodhë me këtë ndërmarrje.

Pacolli në një intervistë për Gazetën Tribuna ditë më parë duke shpjeguar arsyen përse AKP nuk duhet të menaxhojë me Trepçën ka thënë se është absurde që një grup njerëzish të politikës apo shoqërisë civile ta menaxhojnë një gjigant mineral të cilin nuk e njohin as nga përbërja e as nga struktura, madje nuk ia njohin as qëllimet (Tribuna).