Qeveria ka humbur kohë

Lideri i AKR-së Behgjet Pacolli, vlerëson se partisë së tij i është dhënë shumë vonë Ministria e Zhvillimit Ekonomik. Partneri kryesor i koalicionit qeverisës së Thaçit, ka thënë në një intervistë për gazetën “Tribuna” se ka mundur të bëjë shumë më shumë për zhvillimin ekonomik, por kjo nuk i është mundësuar.

Zv/kryeministri i parë është tërhequr pak edhe nga lobimi për shkak të nevojës që të merret me partinë dhe për shkak të asaj që e quan “sjellje jodinjitoze’ të ministrit të Jashtëm, Enver Hoxhaj.

Kreu i AKR-së ka thënë se Kosova nuk duhet të shkojë në zgjedhje të parakohshme nacionale, sepse nuk është kryer reforma dhe se në MZhE duhet të ndodhin disa veprime.

Pacolli e ka mohuar mundësinë që të kandidojë për kryetar të Prishtinës, por nuk është shprehur entuziast as për qëllimin që sërish të jetë president. “Mund të kontribuoj ende por nuk ka rëndësi nga cila trampolinë”, ka thënë Pacolli.

Në detaje, biznesmeni që i ka hyrë politikës në Kosovë, ka folur për idetë e tij se si duhet të funksionalizohet dhe të rritet vlera e gjigantit ekonomik të Kosovës, Trepçës.(Tribuna)