“Gjyq” për mosdeklaruesit e pasurisë

Pritet që në fund të kësaj jave, Agjencia Kundër Korrupsionit (AKK) të dërgojë në gjykata padi për zyrtarët e lartë publikë që nuk e kanë deklaruar pasurinë e tyre.

Drejtori i AKK-së, Hasan Preteni, ka deklaruar për Telegrafin se gjithçka do shkojë sipas ligjeve në fuqi.
“Të gjithë ata zyrtarë që nuk e kanë zbatuar procedurën ligjore për deklarimin e pasurisë, do të përballen me procedura gjyqësore”, ka thënë Preteni.

Njëri zyrtarëve më të zëshëm më këtë proces është deputeti nga radhët e PDK-së, Berat Buzhala. Ai ka thënë se do t’i përgjigjet secilës ftesë së mundshme të gjykatës.

“Por, Preteni do të kishte qenë mirë që duhet t’i këqyrë ato rastet që i ka futur në tepih. Disa prej tyre janë përfolur kohëve të fundit edhe në media, që nuk ka folë për konflikt të interesave të personave të caktuar që i mbajnë nga dy pozita. Për mua HasanPreteni është absolutisht jokompetent dhe jokredibil dhe krejtësisht i dëmshëm në luftën kundër korrupsionit”, ka thënë Buzhala.

Zyrtarët e AKK-së kanë njoftuar e deklarimin e pasurisë e kanë bërë më shumë se 99 për qind e zyrtarëve brenda afatit ligjor, duke shënuar kështu përqindjen më të madhe të deklarimit qysh prej vitit 2007.

Ky proces është obligues, sipas Ligjit për Deklarimin, Prejardhjen dhe Kontrollin e Pasurisë të Zyrtarëve të Lartë Publikë dhe Deklarimin, Prejardhjen dhe Kontrollin e Dhuratave për të Gjithë Personat Zyrtarë.