Libri i ri nga studiuesi Roland Zisi – Miti i Narcisit

Shtatë prozat poetike të botuara nën titullin “Pasqyrat e Narcizit” të E. Koliqit, tregimi i mrekullueshëm “Konkurs bukurie për burrat në Bjeshkët e Namuna” të Ismail Kadaresë, pastaj karakteri i çuditshëm të Djaloshit të Pashëm të novelës “Ata të dy e të tjerë” të Koço Kostës dhe cikli poetik i Agron Tufës nën titullin “Kënga e Narcisit” i kanë mjaftuar studiuesit Roland Zisi, dekani i fakultetit të shkencave të edukimit të Universitetit “E. Çabej” i Gjirokastrës, për të zbuluar prezencën e mitit të Narcizit edhe në letërsinë shqipe.

Libri promovohet pasdite në Gjirokastër në prani të një numri të madh albanologësh, të cilët janë të ftuar për Konferencën Shkencore Ndërkombëtare Albanologjike “Një rilindje para Rilindjes”, organizuar nga Departamenti i Letërsisë i Universitetit të Gjirokastrës “E. Çabej” në bashkëpunim me Universitetin e Palermos dhe Universitetin e Kalabrisë (Itali), si edhe Qendrën e Studimeve Albanologjike dhe Institutin Italian të Kulturës në Tiranë.

Miti i Narcisit ka “shëtitur” në krejt kulturat dhe literaturat europiane e më gjerë. Ai ka frymëzuar dhjetëra shkrimtarë, kompozitorë, dramaturgë, koreografë e piktorë, nga e gjithë bota, në realizimin e veprave artistike të pavdekshme. Në këtë kontekst, libri i prof. Roland Zisi “Miti i Narcisit në letërsinë shqipe” përmes një studimi monografik na sjell jehonën, refleksin dhe ndikimin e mitit të Narcisit në letërsinë shqipe, funksionin estetik të këtij miti në veprat e autorëve shqiptarë si dhe analizimin e diferencave letrare mes autorëve, të cilat janë rezultat i sensibiliteteve dhe qasjeve individuale ndaj tij.
Skeda e librit:

Titulli: Miti i Narcisit në letërsinë shqipe
Autori: Roland Zisi
Gjinia: Studim monografik
Recensues: Ali Xhiku, Luçiano Boçi
Redaktor shkencor: Tomor Plangarica