Peticioni kundër shtrenjtimit të rrymës shkon “në vesh të shurdhër”

Zëri i më shumë se 30 mijë qytetarëve, të cilët kundërshtuan rritjen e çmimit të energjisë elektrike, mbetet i padëgjuar.

Jo që është ndonjë gjë e pazakonshme në Kosovë, por me fillimin e rënies së temperaturave, konsumatorët do të ballafaqohen me faturat e larta, duke e ndier kështu edhe më shumë efektin e rritjes së çmimit.

Organizatat e Shoqërisë Civile që organizuan peticionin thonë se mbesin në pritje të konstituimit të Kuvendit për t’ia dërguar nënshkrimet. Gjithashtu, Puka bën të ditur se OJQ-të me profile juridike janë duke përgatitur bazën ligjore që rritja të kundërshtohet edhe në Gjykatat respektive e deri në Gjykatën Kushtetuese, raporton KTV.

Por, vonesat në konstituimin e institucioneve, mes tjerash edhe faturat me çmime të larta, do të rrisin edhe më shumë frustrimin te qytetarët, transmeton Koha.net. Yll Rugova, që ishte pjesë e iniciativës për peticion, thotë se ideja e protestave ishte diskutuar para se të fillonte mbledhja e nënshkrimeve.

E deri në dhjetor, eventualisht janar të vitit të ardhshëm, Rugova thotë se edhe nëse nuk thirren nga shoqëria civile, protestat mund të fillojnë sërish me nismë të qytetarëve.
© KOHA.net