Sqarim i Kolegjit “Gjilani”

Gjilan – Kolegji “Gjilani” për hir të opinioni publik jep një sqarim profesional rreth aktakuzës së ngritur nga Prokuroria Themelore e Gjilanit e botuar në rajonipress më 10 shtator 2014.

Kolegji ”Gjilani” këtë aktakuzë që nga fillimi e ka parë si tendencioze, joprofesionale dhe e bazuar në fakte e prova inekzistente. Ne që nga fillimi i punës sonë kemi punuar me nder e përkushtim për të pasur një kolegj vërtet cilësor që parim kryesor ka edukimin dhe arsimimin e brezave të rinj.

Aktakuza e Prokurorisë së Gjilanit pos që është e ngutshme dhe joprofesionale ajo nuk bazohet në asnjë argument juridik sepse për kohën që po bëhet fjalë nuk ka pasur Agjencion të Akreditimit, Ndërsa që nga themelimi i Agjensionit të Akreditimit Kolegji “Gjilani” është i akredituar dhe së fundi për periudhën 5 vjeçare në nivelin Bachellor dhe Master, këtë opinioni publik mund edhe ta vërtetoj në web faqen zyrtare të Akreditimit.

Ne e dimë mirë se kjo aktakuzë ka të vetmin synim që të dëmtojë Kolegjin “Gjilani” i cili është ambasador i mësimit cilësor në Anamoravë dhe ka një staf të përgatitur e profesional.

Jemi të sigurt se Kolegji “Gjilani” do ta fitojë këtë betejë kurse i njoftojmë studentët tanë se ne jemi shumë stabil dhe do të ecim së bashku pavarësisht rivaliteteve të shumta dhe konkurrencës.

Kolegji “Gjilani” ndihet komod dhe shumë pozitiv në punën e tij disa vjeçare dhe presim që Prokuroria dhe Gjykata ta trajtojë drejt rastin tonë dhe mos të japi paragjykime para se të vendoset rasti thuhet në sqarimin e Kolegjit”Gjilani”./rajonipress/