Skuadra të reja, në garë për Xhakën

Skuadra të reja janë futur në garë për të transferuar Granit Xhakën, ka njoftuar sajti “fussball.ch”.

Për reprezentuesin e Zvicrës së fundi po shfaq interes Lazio që edhe më herët ka përcjellë gjendjen e Xhakës. Xhaka pritet të largohet nga Borussia Moenchengladbach, ndërsa Lazio është duke kërkuar një mesfushor me tipare të tij.

Ai mund t’i kushtojë Lazios rreth 10 milionë euro. Për Xhakën 21-vjeçar, po interesohet edhe Spartaku i Moskës. Por gjasat më të mëdha janë që Xhaka të kalojë tek Interi. Ai ka kontratë me Moenchengladbachun deri në verë të vitit 2017.

Ndërkohë, disa mediume zvicerane nuk po kursejnë Xhakën para botërorit. Gazeta e njohur “Blick” ka shkruar të premten për një foto të publikuar në “facebook” në të cilën shihej një diler i drogës në shoqërinë e Xhakës.

Për këtë foto është raportuar të jetë bërë të enjten në një promovim që Xhaka dhe lojtarë të tjerë të përfaqësueses patën në Basel. Gjatë ceremonisë, lojtarët bënë foto me shumë tifozë. Dileri, për të cilin është raportuar të jetë serb, është dënuar dhe pritet të vuajë burgun rreth katër vjet.
©KOHA.net