PDK kishte kyçur Vitinë në autostradën “Arbër Xhaferi”

Viti – Në kohën kur ishte nënshkruar marrëveshja për autostradën “Arbër Xhaferi” që do lidhte Prishtinën me Shkupin, qëllimi ishte të lidheshin edhe qytete e rajone të Kosovës kah kalonte autostrada, përveç lidhjes së saj me Maqedoninë dhe portin e Selanikut.

Projekti ishte bërë nga Bechtel Enka në bashkëpunim me Ministrin e Infrastrukturës që në atë kohë udhëhiqej nga Fehmi Mujota nga radhët e PDK-së, kurse kyçja për Vitinë ishte paraparë afër Restaurant Parku në Gërlic që i bie 1000 metra( 1km) larg urës ekzistuese që lidhë Vitin me rrugën Shkup-Prishtinë.

Një kyçje e tillë përveç që lidhte Vitinë shumë afër me autostradë kishte marrë parasysh edhe interesat e bizneseve që gravitojnë aty përreth, mirëpo me ardhjen në krye të Ministrisë së Infrastrukturës të Ministrit Lutfi Zharku nga radhët e LDK-së kyçja që ishte paraparë afër Restaurant Parku zhvendoset për disa kilometra tutje pikërisht në arat e Lutfi Zharkut tek prona e tij në Fushën e Pajtimit.

Kryetari i Komunës së Vitisë Sokol Haliti në vend se të informoj qytetarët e Komunës së Vitisë me të vërtetën, ka zgjedhur të manipuloj qytetarët me memorandume sikur ai që nënshkroi me ministrin Zharku për kyçje nëpërmes Sodovinës dhe që më vonë e demantoi vetveten pasi doli në një takim tjetër me Kryeministrin Isa Mustafa dhe tha se do ketë kyçje në Gerlic as ky manipulim elektoral Sokol Halitit nuk i zgjati shumë pasi vet Qeveria e Kosovës doli me deklaratë dhe tha se nuk mund të ndërhyjnë në projektin e Bechtel Enkes.

I kërkojmë Sokol Halitit të tregoj se interesat e kujt ka zgjedhur t`i mbroj, të qytetarëve të Komunës së Vitisë apo interesat private të bashkëpartiakut të tij të LDK-së ministrit Lutfi Zharkut, nëse nuk ka edhe ai ndonjë interes privat në këtë mes.

Manipulimeve për tri vjet rresht të Sokol Halitit po ju vjen fundi, blerja e çmimeve si “ Misionarë i Paqes së OKB-së”, “Doktor Honoris Causa” e mirënjohjeve si “ Komuna më e suksesshme në Kosovë” nga OJQ të dyshimta dhe “projekteve” famoze të tij si Palestra Sportive e Shkolla Fillore në Pozheran e projekte të tjera mbeten vetëm pjesë e manipulimeve të tij.

Mirëpo qytetarët kanë kuptuar logjikën e tij të premtimeve boshe. Ai do të kujtohet si kryetar i “vijave të bardha”, asfaltit dhe parqeve me bar, edhe ashtu me tjetër gjë s`ka me çka krenohet gjatë qeverisjes së tij thuhet në reagimin e kryesisë së PDK-së dega në Viti./rajonipress/