9 gabime që bëni kur konsumoni ushqimet e lehta dhe alternative

Në një botë të dominuar nga kultura e dietës dhe pritshmëritë e rrepta rreth mënyrës së të ushqyerit, të marrësh një meze të lehtë shpesh perceptohet si një akt i turpshëm apo i papërgjegjshëm.

Por në realitet, të hash diçka për të përmbushur urinë apo për të rifituar energjinë është një nga sjelljet më të natyrshme njerëzore.

Dhe ky realitet ka filluar të gjejë gjithnjë e më shumë mbështetje nga profesionistët e shëndetit dhe ushqyerjes.

Ideja që mëngjesi, dreka dhe darka duhet të plotësojnë të gjitha nevojat ushqyese të ditës nuk është vetëm e vjetër, por edhe e kufizuar.

Jo çdo trup funksionon njësoj, dhe shumë faktorë si aktiviteti fizik, ritmi i jetës apo metabolizmi individual ndikojnë në mënyrën dhe kohën kur kemi nevojë për ushqim.

Siç thekson dietologia Emily Van Eck, “është shumë normale të ndihesh i uritur midis vakteve”, dhe pikërisht për këtë arsye, ushqimet e lehta luajnë një rol thelbësor në ruajtjen e energjisë dhe përqendrimit gjatë ditës.

Megjithëse ushqimet e lehta janë të dobishme, mënyra se si i konsumojmë mund të bëjë ndryshimin mes një përfitimi të shëndetshëm dhe një zakoni të dëmshëm.

Më poshtë janë disa nga gabimet më të zakonshme dhe mënyrat për t’i shmangur ato:

1. Të shtypësh ndjenjën e urisë

Shumë njerëz shmangin ushqimet e lehta për shkak të ndjenjës së fajit që kanë për t’u ‘shkelur’ nga kultura e dietës. Por dëshira për një meze të lehtë nuk është shenjë dobësie, është sinjal i trupit që kërkon energji.

2. Të ndihesh fajtor për zgjedhjet ushqimore

Të preferosh një biskotë në vend të një fruti nuk është mëkat. Siç thekson Van Eck, të gjitha ushqimet kanë vendin e tyre në një dietë të balancuar, për sa kohë konsumohen me vetëdije dhe pa teprime.

3. Të shmangësh ushqimet e lehta gjatë natës

Ngrënia pas orës 8 nuk është ‘ndaluar me ligj’ nga trupi. Nëse ka kaluar një kohë e gjatë nga vakti i fundit, një ushqim i lehtë para gjumit mund të ndihmojë në shmangien e urisë që prish gjumin, për sa kohë shmangen ushqimet që nxisin urth ose parehati.

4. Të injorosh dëshirat e trupit

Zëvendësimi i një ushqimi që dëshiron me një alternativë ‘më të shëndetshme’ por që nuk të kënaq, nuk e largon dëshirën, e shtyn. Dhe shpesh përfundon në ushqim të tepërt më vonë. Dëgjo trupin tënd.

5. Mosbalancimi i përbërjes ushqyese

Ushqimet e pasura vetëm me karbohidrate japin energji të shpejtë, por të përkohshme. Shtimi i proteinave, yndyrnave të shëndetshme ose fibrave ndihmon në zgjatjen e ndjesisë së ngopjes dhe përmirësimin e vlerës ushqyese të ushqimit të lehtë.

6. Të hash në mënyrë të parregullt

Ngrënia spontane dhe e çrregullt mund të çojë në zgjedhje impulsive dhe ushqim të tepërt. Planifikimi i një ose dy ushqimeve të lehta në ditë, çdo 3-4 orë ndihmon në ruajtjen e energjisë dhe qetësisë mendore.

7. Të hash direkt nga paketimi

Të hash nga qesja apo kutia e biskotave shpesh çon në teprim pa vetëdije. Servirja e ushqimit në një tas ndihmon në vetëdije dhe kontroll të sasisë.

8. Të hash gjithë ditën vetëm ushqime të lehta

Disa njerëz zëvendësojnë vaktet e plota me ushqime të vogla për shkak të mungesës së kohës, por kjo mund të rezultojë në mungesa ushqyese dhe ndjenja të pakënaqësisë. Një mini-vakt i mirë strukturuar është më i dobishëm se shumë snack-e të shpërndara gjatë ditës.

9. Të përdorësh ushqimin si zëvendësim për kujdesin ndaj vetes

Ushqimet e lehta nuk janë terapi. Nëse jeni të stresuar, të lodhur apo emocionalisht të rraskapitur, ndaloni dhe pyesni veten: A kam vërtet uri, apo më duhet pushim, qetësi, përqafim apo gjumë?