70 fëmijë emigrantë mësojnë shqipen në Selanik

Rreth 70 fëmijë të emigrantëve shqiptarë të lagjeve perëndimore të Selanikut në Greqi do të vijojnë për të dytin vit sezonin e ri të kursit të gjuhës shqipe.

Nën mbështetjen e Komunës Pavlo Mela dhe të shkollës publike, fëmijët do të mësojnë një herë në javë, në një prej klasave për ata fëmijë që duan të mësojnë gjuhën amtare.

“Jemi përkrah miqve të shoqatës, duke dhënë çdo ndihmë për t’u realizuar kjo përpjekje në mënyrën më të mirë dhe të kemi rezultate më të mira, si në aspektin e edukimit të fëmijëve, ashtu edhe në atë të miqësisë shqiptaro-greke”, tha Konstandinos Pantsis, zv.kryetar i Bashkisë Pavlo Mela, transmetojnë mediat në Tiranë.

Kjo nismë mbështetet edhe nga shoqata shqiptaro-greke e punëtorëve dhe miqve të Selanikut, “Progresi”.

Mësimet do të zhvillohen falas, një herë në javë dhe të paktën katër mësues deri tani kanë shprehur dëshirën e tyre vullnetarisht për t’u dhënë mësim nxënësve shqiptarë.

Selaniku është qyteti i pari që filloi mësimdhënien e gjuhës shqipe në shtetin helen, më 7 mars të vitit 2001, ndërsa në gjithë vendin mund të jenë të paktën mbi 30 kurse.

albinfo.ch