550 vjetori i vdekjes së heroit kombëtar

Gjergj Kastrioti – Skënderbeu në këngët tona popullore

1. KUSHTRIMI I SKËNDERBEUT
Autor i këngës : Zekeria Çarkaxhiu

Frynë murrlani me stuhi –
Qielli ç’ bubullinte !…
Nën Flamurin Kuq e Zi –
Çetës po i printe !
Refreni:
Hej, trim , o Skënderbe ,
O, krenari shqiptar – e !
Për t’ çliru’ Atdhe’n –
Luftë ke nisë ma i parë – e !

Dyzet trima si rrufe ,
Kaluan shpatit shkonin !…
Bashkë me trimin Skënderbe –
Turkun ta luftonin !
Refreni:
Hej, trim , o Skënderbe …etj.

Si rrufe u hap kushtrimi –
Kudo ndër shqiptarë – e !
S’ durojmë prangat e robërimit –
Për pa vdekë ma parë – e !
Refreni:
Hej, trim , o Skënderbe …etj.

( Recitativi – femër ) :

-Po ku jeni nisë, o burra ?
Burrat :
-Vendin ta çlirojmë !
Femra :
-Qe besa më merrni edhe mua –
Se ma kështu s’ mundë të durojmë !

Grupi:
T’ japim fjalën t’ gjithë sa jemi ,
Trim , o Skënderbe :
Për Liri e për Atdhe –
Vdesim si me le !
Refreni:
Hej, trim , o Skënderbe …etj.

2. BINI DJEMTË E KASTRIOTIT

N’ maje t’ malit , matanë bregut –
Lufton çeta e Skënderbeut !
Bini djemtë e Kastriotit –
Syri i Shqipes , besa e Zotit !

N’ maje t’ majës , n’ maje t’ gurit –
Lufton çeta e Bajram Currit !
Bini djemtë e Kastriotit –
Syri i Shqipes , besa e Zotit !

N’ maje t’ majës s’ Qyqavicës –
Lufton çeta e Azem Galicës !
Bini djemtë e Kastriotit –
Syri i Shqipes , besa e Zotit !

Recitativi :

O, Flamuri Kuq e Zi ,
Që valon nëpër Shqipëri ;
Fort po t’ lutë Sharr e Rugovë –
Të valosh nëpër Kosovë !

Bini djemtë e Kastriotit –
Syri i Shqipes , besa e Zotit !

3. HEJ KY SKËNDERBEU

Hej , ky Skënderbeu ,
Lufton si lua ;
Veshun duel Sulltani –
Krujën, o , rrafsh me e ba !

Hiq Sulltan taborret –
S’ t’ falet Kruja kurrë !
Skënder Be krutani –
Lufton në shkamb me gurë !
Refreni:
Hej, hej ! Skënderbeu vërsulet ,
Rrufe shpata e tij !
Padishah Murat , o ,
Ne do t’ bajmë Liri !

Atje nga Malësia ,
Bota banë çudi –
Kush e vret Skënderin ,
Me bashkë malësorët e tij ?!

Kur tani Stambolli ,
Në agim të vet ;
Atje ku kënduan, o,
Padishah , mos tret !
Refreni:
Hej, hej ! Skënderbeu vërsulet …etj.

4. KANGA E SKËNDERBEUT

Trim i madh , o Skënderbe ,
Por sa linde i çele sytë ,
N’ vatrën tënde shkrepi dritë ,
Sikur rrezja e parë e Diellit ,
Që i bien bjeshkës e i bien Qiellit .

T’ ndanë prej nënës – t’ vajtoj motra ,
Bashkë me vëllezër t’ ndanë nga vatra .
Me njatë urdhër t’ Otomanit –
Shumë shërbeve n’ tokë t’ Sulltanit ,
Duke u djegë për Diell t’ Vatanit !

Trim i madh, ti kur u bëre –
Bota ndjeu për fuqinë tënde !
Male e fusha, ti kalove –
Marrshin tënd , kush s’ mund e ndali ,
Erdhe n’ Krujë si shqiponjë mali !

T’ priten sulme ma t’ vështira –
Mbrapa ktheve shumë ushtri !
Nam po bëjnë do shqipe t’ lira ,
Si rrufe n’ zemër t’ Ballkanit ,
Që s’ duan t’ lënë Atdhe’n n’ robëri !

Tash kremtojmë Pesëqindvjetorin ,
Qysh se vdiqe , o drangua –
N’ zemrat tona t’ kem ngujua !
Nuk t’ plakë koha , nuk t’ plakë moti –
Kurrë nuk vdes Gjergj Kastrioti !

5. KËNGË PËR SKËNDERBEUN

Trim i dashur dhe i parë –
Trimi Skënderbe !
Natë e ditë luftoi pa para –
Tigër ndër bete !

Prinë përpara me fuqi –
Trimi legjendar !
Me Flamurin Kuq e Zi –
Bini bajraktarë !

Me kangë t’ buk’ra do t’ kujtojmë –
Trim , o Skënderbe !
Emnin tand s’ do ta harrojmë –
Që kujtim na e le !

6. SKËNDERBEU – GJERGJ KASTRIOTI

Kush qe ai trim ma i zoti ?
Skënderbeu – Gjergj Kastrioti !
Skënderbeu – Gjergj Kastrioti ,
Of, aman, aman, aman – e ,
O , për dorën – e ,
Për shpatën tande ,
Aman, aman- e !

Çka ka bjeshka që po dridhet ?
Skënderbeu në to po ngjitet !
Skënderbeu në to po ngjitet ,
Of , aman, aman, aman – e ,
O , për turqit – e ,
Për kokën e tyre ,
Aman, aman – e !

Çka ka Pasha që po kjan – e ?
Skënderbeu , o , fjalë po i çon- e !
Skënderbeu , o, fjalë po i çon – e ,
Of, aman, aman, aman- e ,
O, për turqit –e ,
Për kokën e Pashës,
Aman, aman – e !

Jepi ujë me dorën tande ,
Ti , moj vasha përmetare !
Ti , moj vasha përmetare ,
Of, aman, aman, aman – e ,
O , për belin – e ,
Për kokën tande ,
Aman , aman – e !

7. SKËNDERBEU KE GURI I VASHËS

Çoj selam, ai Sulltan Murati –
Tanë ordinë të ma bani gati ,
Nën komandën e Dervish Pashës ,
Me luftu’ , o, ke Guri i Vashës !
Nisen t’ rijë , o, tha , pleq nizame ,
S’ lanë xhamia pa falë akshame !
Nuk lanë lutje , o, pa i ba Zotit –
Me e zhdukë racën e Kastriotit !

Mu n’ Varosh , o , ke Guri i Vashës –
Buçet turma fashiste turke !
Shtyhen forcat , o, prej ushtrisë – e –
Thyhen trupat , o, të Turqisë – e !
Skënderbeu me shpatë në dorë – e ,
Paska dalë , o, ke Guri i Vashës ,
Çka po i thojka , bre, Dervish Pashës ,
Po m’ ia ngrihka dyzgjijtë e atit –
Shumë selam t’ mi bajsh Sulltan Muratit !

Thuaj , sa do , o, me shumë taborre ,
Se n’ Varosh , krejt kam me i mbjellë n’ vorre !
Se me gjak , o, t’ Anadollakut –
Ka me u skuqë dhe Lugina e Matit !
Kush asht ai, o, që do t’ guxojë – e ,
Vendin tonë që do ta sulmojë – e ,
Ka me ikë , o , si këlysh zagari –
Se me gjak , o, e mbjell shqiptari !

8. ME SHPATË N’ DORË KUSH PRIU I PARI

Me shpatë n’ dorë kush priu i pari ?
Skënderbeu , ai burrë shqiptari .
Asht i lemë n’ atë trimen Krujë ,
E nuk duroi , o, ta shkelë , o, i hueji.
Qysh se t’ vogël tetëvjeçarë ,
Turqit me veti , o, e kanë marrë .
Me e luejt’ shpatën , o, e kanë m’su’,
Veç për ta , more , me luftu’.

Kur u rritë , e çuen ushtar ,
E graduen , e banë të parë .
I duel zani , o, në Ballkan ,
E tuj luftu’ , more, si luan .
Nanë e babë, more , edhe motër ,
Po i çojn’ letër djalit t’ vogël .
T’ fal’ me sh’ndet , selam po i çojnë ,
E mos harro , biro, vendin tand !

Kur e muer at letër t’ mallit ,
Po i kujtohen fjal’t e plakut ,
Kur ia thojke rreth oxhakut ,
Kur ia thojke baba i ti :
“ Ma mirë dekë se gjallë n’ robni !”
At’her’ lot po i shkojn’ si gurra ,
Fjalë Sulltanit , po i çon me turra ,
Dy vllazni , more , pre m’i ki ,
E tash po kthehem , o, për Shqipni !

Kur ia than’ , more , fjal’t Sulltanit ,
Fort i briti , aj Ballabanit :
“Shumë ushtri n’ Krujë me i çu’ ,
E gjallë , a dekë Gjergjin ta du’ !”
Na u kthy’ Gjergji, o si vetima ,
Na i bashkoj në Lezhë do trima .
Po ua thot’ dy a tri fjalë:
“Pashë at’ besën o qi e kem’ t’ parë !

Na t’i lidhim o duer e gishta ,
E t’i lamë xhamia e kisha !
Do t’ luftojmë’ me pleq e t’ ri ,
E t’ ruejm’ atdhen’ , more, t’ ruejm lirin’ !”
Na u nis lufta , na u nis beteja ,
Sulm po bajnë trimat si rr’feja .
Dhambët e Gjergjit po i qitshin flakë ,
E n’ dy anët trimi pret me shpatë .

Shka po bante o motra Mrika ,
Nuk e dinte se qysh asht hika .
Krah për krah me shok’t e vet ,
Po lufton , po u jep gajret .
Ballë për ballë me pashallarë ,
Nji ushtri me pak shqiptarë .
I duel hakut o osmanlisë ,
E i zbardhi f’tyrën e shqiptarisë .

Skënderbeu , more , i hypi atit ,
I çoi fjalë Sulltan Muratit :
“T’ koftë dhanë fjala e besa e Zotit ,
Nuk do t’ lamë n’ tokë t’ Kastriotit !
Mos t’ lakmon kush në këtë votër ,
Se na desim i madh e i vogël !
Se na desim o gra e f’mijë,
O për flamur , more, kuq e zi !”

9. VDEKJA E SKËNDERBEUT

Kah tregu nji brimë u ndi
Që shkoi tue shtue mënerën ,
Ndër zemra e ndër pallate .

Ishte Lekë Dukagjini
Ballin përpiqte me i dorë ,
Ndukte leshin me tjetrën !

“Trandi Arbëri ,
Jeta na u err për ne ,
Skënderbeu s’ asht ma !

Eni zonja e bujarë
Eni të vapshta e ushtarë ,
Eni kjani me idhnim .

Sot të varfën metët ,
Pa tatë që ju këshillonte ,
Ju këshillonte i zbatoshi .

Ndien shpijat e u trandën ,
Ndien malet e u ndanë ,
Shkrepat mbi kroje ranë .

Kumbonaret e kishavet ,
Xunë me tingllue së vedi !

*****Mblodhi , shënoi dhe i këndoi : Demir KRASNIQI