42 muaj burg për grupin që kontrabandoj migrantët

Gjilan – Gjykata e Qarkut në Gjilan ka dënuar dhe shpallur fajtor Blerim Rexhepin me 15 muaj burgim, Defrim Zylfiun me 15 muaj burgim dhe Sonja Ristiq (police) me 12 muaj burgim.

Në Gjykatën e Qarkut në Gjilan është shpallur aktgjykimi nga ana e gjykatësit Hasan Sadiku për grupin e akuzuar për kontrabandim me migrantët. Hasan Sadiku duke shpallur aktgjykimin dhe duke arsyetuat vendimin tha se Blerim Rexhepi, Defrim Zylfiu dhe Sonja Ristiq (police), të akuzuar për veprën penale kontrabandimi me migrantët janë fajtor sepse që nga data 10 maj 2012 në mënyrë të organizuar, duke i ndarë rolet dhe detyrat secili veç e veç janë marrë me kontrabandimin e migrantëve, të dëmtuarve Ali Velijudin, Fatih Fudejl dhe Xhemal Hamdi, shtetas Sirian dhe Mumin dhe Adil N. shtetas algjerian.

Të pandehurit i kanë vendosur në motel restorantin “Astor”, organizojnë trafikimin e të dëmtuarve që përmes shtetit të Serbisë, t`i dërgojnë në shtetet e Evropës perëndimore, ashtu që për kundërshpërblim t`i japin nga 800 euro, për person duke ju premtuar se do të angazhojnë edhe policen Sonja Ristiq, për t`i përcjellur deri në kufirin me Hungarinë.

I pandehuri Blerim Rexhepi pastaj i ka dërguar në Bujanoc, tek stacioni i autobusëve, ku i ka pritur e pandehura Sonja Ristiq, e cila u ka lënë dy bileta të dëmtuarve Mumin dhe Adil, e të cilët më pastaj arrestohen nga policia serbe.

Gjykata duke marrë parasysh veprat ka dënuar dhe shpallur fajtor Blerim Rexhepin me 15 muaj burgim, Defrim Zylfiun me 15 muaj burgim dhe Sonja Ristiq (police) me 12 muaj burgim.

Janë interesante dëshmitë që kanë dhënë palët e dëmtuara, dhunën që kanë përjetuar nga policia serbe dhe të gjitha malverzimet e kryera nga ana e të pandehurve.

Kryetari i Gjykatës së Qarkut në Gjilan Zyhdi Haziri tha për rajonipress se tre të dënuarve tashmë u është ndërprerë paraburgimi./rajonipress/