400 mijë euro për objektin modern të Hidromoravës

Gjilan – Mbi 400 mijë ka kushtuar objekti i ri i Hidromoravës i financuar nga Ministria për Zhvillim Ekonomik. Tani kushtet si për punëtorët ashtu edhe për konsumatorët janë më të mira thotë Momin Morina.

Punëtorët e Hidromoravës duke përfshirë edhe stafin e saj për një kohë të gjatë kanë punuar në një barakë me kushte të papërshtatshme për punë .Por tani gjërat kanë ndryshuar pasi një donacion i Ministrisë së Zhvillimit Ekonomik në vlerë të 400 mijë eurove i ka bërë me objekt të ri dhe zyre moderne.

Momin Morina drejtor teknik tha për rajonipress se Hidromorava tani është vendosur në objekt të ri, me kushte të reja dhe me hapësirë të mjaftueshme për punë. “Pos MZHE e cila ka investuar në këtë projekt edhe vet Hidromorava ka investuar në rregullimin e hapësirës gjelbëruese, dhe fontanës” tha ai.

Sipas Morinës Hidromorava duke llogaritur edhe dy njësit e saj në Kamenicë dhe Viti ka 150 punëtor. “Kushtet për punë tani janë tepër komode kurse për konsumatorin do të ketë hapësirë të mjaftueshme për pritje dhe për kryerjen e shërbimeve. Morina tha se këto kushte komode e obligojnë stafin e kompanisë që të jenë më azhur dhe më të përgjegjshëm për të ngritur nivelin e pagesës”.

Morina tha se momentalisht ka një ulje të inkasimit, por kjo është normale sepse fillimi i vitit të ri shkollor ndikon që prindërit të shpenzojnë më shumë për fëmijët e tyre .

Megjithatë borxhlinjtë kryesor të Hidromoravës vazhdojnë të mbeten amvisëritë kurse serbët kanë filluar të përgjigjen në pagesat ndaj kompanisë. “Sidomos serbët e Shillovës janë integruar dhe po paguajnë me kohë faturat” u shpreh Morina.

Sipas Morinës kushtëzimi i qytetarëve për të paguar kompanitë publike ka ndikuar tepër pozitivisht derisa edhe ndërmarrjet shoqërore janë më aktive dhe po i kryejnë borxhet tha ai./rajonipress/