3 vjet e 9 muaj burg për Kreshnik B.

Procesi kundër kosovarit ka qenë procesi i parë i mbajtur në Gjermani kundër një pjesëtari të IS-it.

Kreshnik B., një i ri 20 vjeçar i lindur në Gjermani dhe me prejardhje nga Kosova është dënuar dje nga Gjykata e Lartë e Landit në Frankfurt me vuajtje dënimi prej 3 vjet e 9 muaj burg. Dënimi i është shqiptuar për veprën penale anëtarësim në një grupim terrorist të huaj.

Në verën e vitit 2013 Kreshniku i ishte bashkuar grupit xhihadist të Shtetit Islamik (IS) në Siri, ndërsa në dhjetor të po atij viti ai ishte kthyer në Gjermani ku ishte arrestuar në Aeroportin e Frankfurtit.

Procesi kundër kosovarit ka qenë procesi i parë i mbajtur në Gjermani kundër një pjesëtari të IS-it. Për shkak të moshës, Kreshnik B. është dënuar me një masë ndëshkuese për të mitur.

Duke i shqiptuar dënimin, kryetari i trupit gjykues ka theksuar se gjykata e sheh ende rrezikun që Kreshnik B. të joshet nga predikuesit e urrejtjes. Megjithatë, ai nuk është dënuar për qëndrimin e tij por për veprimet.

Trupi gjykues ka ardhur në konstatimin se i riu kishte marrë pjesë në luftime, por ai vetë ka këmbëngulur se nuk ka shtënë në njerëz.

Si pala e akuzës ashtu edhe ajo e mbrojtjes janë treguar të kënaqur me masën e dënimit. Sipas prokurorit, ky dënim “dërgon një sinjal domethënës”, shkruan diewelt.de. Por ai ka shtuar se Kreshniku është sërish në rrezik që të bjerë nën ndikimin e qarqeve të gabuara”. Në padinë e bërë ishte kërkuar një dënim pej 4 vitesh burg.

albinfo.ch