28 vende më lartë

Në raportin e Bankës Botërore “Doing Business 2013”, Kosova e ka përmirësuar ambientin e biznesit duke u ngjitur për 28 vende më lart. Por, ajo mbetet e fundit në raport me vendet e rajonit. Institucionet e Kosovës e vlerësojnë lart këtë rangim, ndërsa ekonomistët thonë se ka ende vend për përmirësime.

Me dy reforma, ambienti i biznesit në Kosovë u përmirësua në sy të investuesve të huaj.

Përkushtimi më i madh për ata që ia mësyjnë të investojnë në Kosovë dhe lehtësimi i kushteve të fillimit të biznesit e kanë radhitur Kosovën në vendin e 98-të në raportin e Bankës Botërore për bërjen biznes, nga i 126-i sa ishte vitin e kaluar.

Kjo edhe është lëvizja më e madhe e vendit që kur ka hyrë në këtë listë.

Megjithatë, në raport me vendet e rajonit, mbetet gati e fundit në listë, pas Shqipërisë, Maqedonisë e Serbisë, ndërkaq në pozitë më të keqe në këtë raport shihet të jetë Bosnja e Hercegovina e cila radhitet e 128-a.

Maqedonia ka vendin e 23-të dhe llogaritet si lidere e të bërit biznes në rajon, Mali i Zi të 51-in, Shqipëria vendin e 85-të dhe Serbia në vendin e 86-të.

Njohës të ekonomisë vlerësojnë se ky është një lajm i mirë se në Kosovë diçka po punohet për të mbarë, por kërkojnë nga institucionet që të angazhohen edhe më tej për të përmirësuar ambientin e biznesit karshi vendeve të rajonit me të cilat është në konkurrencë të drejtpërdrejtë.

Sipas raportit të Bankës Botërore “Doing Business 2013”, me reformën e bërë në mbrojtjen e investuesve, Kosova është ngritur për 76 pozita më lart, duke e bërë ngritjen më të madhe krahasuar me indikatorët tjerë të këtij raporti.

Ndërkaq, sa i përket përmirësimit të kushteve për fillimin e biznesit, vendi është ngritur për 44 pozita më lart. Këtu përmendet shkurtimi i kohës së regjistrimit të biznesit dhe marrja e lejeve për afarizëm si dhe eliminimi i kostos për hapjen e bizneseve të reja.

Zyrtarët e Ministrisë së Tregtisë vlerësojnë se janë duke bërë reforma rrënjësore në përmirësimin e ambientit afarist në Kosovë.

Madje thonë se disa nga reformat e ndërmarra nuk janë marrë parasysh në këtë raport, e që shpresojnë se vitin tjetër të përfshihen.

“Zëvendëskryeministrja Mimoza Kusari – Lila do ta adresojë këtë çështje sa më parë tek Banka Botërore, e cila nëse nuk ndikon në përmirësimin e rangimit këtë vit, të paktën të merret parasysh për vitin që vjen. Ministria e Tregtisë dhe Industrisë është e përkushtuar të vazhdojë reformat në përmirësimin e ambientit më të favorshëm për të bërë biznes”, thuhet në njoftimin për media të MTI-së.

Në kuadër të këtyre reformave, në MTI thonë se është bërë shkurtimi i kohës për regjistrimin e biznesit nga 52 ditë në vetëm tri ditë për shoqëri aksionare, janë hapur 26 qendra për regjistrim të biznesit “one-stop-shop”, ku bizneset mund t’i kryejnë të gjitha shërbimet në një vend dhe të marrin numrin e regjistrimit të biznesit, bashkë me numrin fiskal brenda ditës në një dokument të vetëm.

Drejtori i Qendrës për Hulumtime Strategjike dhe Sociale , STRAS, Ibrahim Rexhepi, thotë se rangimi i vendit në pozitë më të lartë është një tregues i mirë për ambientin e biznesit sado që kjo nuk është maksimumi që mund të bëhet pasi krahasuar me vendet e rajonit Kosova mbetet e fundit.

“Kosova duhet ta kuptojë se duhet të hyjë në një garë konkurrente me vendet e rajonit e jo me fise të Afrikës”, thekson Rexhepi.

Sipas tij, është e pritshme që me një përkushtim sado të vogël të ketë ngritje të vendit në pozita edhe më të larta, por nuk mund të presësh ngritje nga Singapori që zakonisht e ka vendin e parë, pasi atje veçse e kanë arritur maksimumin e reformave të mundshme.

Edhe sekretari i Odës Ekonomike të Kosovës, Berat Rukiqi, vlerëson se është lajm i mirë për biznesin në përgjithësi krijimi i kushteve më të mira të të bërit biznes.

“Kjo do të ndikojë edhe në perceptimin e investitorëve për Kosovën”, thotë Rukiqi.

Megjithatë, ai thotë se këto reforma nuk vërehen menjëherë në zhvillimin e biznesit.

Në përgjithësi, vlerësimi i raportit të Bankës Botërore bazohet në 11 indikatorë: fillimi i biznesit, marrja e lejes për ndërtim, sigurimi i energjisë elektrike, regjistrimi i pronës, marrja e kredisë, mbrojtja e investitorëve, pagesa e taksave, zbatimi i kontratave, zgjedhja e pamundësisë së borxhit, tregtia përmes kufjeve dhe punësimi i punëtorëve.