17 orë bisedime, pa marrëveshje
RajoniPress
08:18, 17 Qershor, 2015
Takimi 17-orësh i grupeve punuese të delegacionit të Kosovës dhe atij të Serbisë për zbatimin e marrëveshjes për telekomin ka përfunduar në Bruksel, me mospajtime të shumta ndërmjet palëve. Megjithatë edhe pas këtij takimi është përsëritur deklarata e njëjtë sikurse në takimet tjera se “ka përafrim të qëndrimeve”.
Përderisa, kryenegociatorja kosovare, Edita Tahiri ka thënë se Kosova do ta marrë prefiksin telefonik 383 përmes aplikimit të Austrisë në emër të Kosovës në Unionin Ndërkombëtar të Telekomunikimeve (ITU), kryesuesi i delegacionit serb, Marko Gjuriq, e ka kundërshtuar deklaratën e Tahirit duke thënë se “Kosova mund ta marrë prefiksin nga ITU vetëm nëse kërkon Serbia”.
Këto deklarata që u dhanë pas takimit maratonik, dëshmojnë mosafrimin e qëndrimeve ndërmjet dy palëve./zeri/
