15 vjet burg shqiptarit nga Maqedonia për tentim-vrasje të kosovarit

Gjykata e Lartë e Kantonit të Bernës ia ka vërtetuar sot një shqiptari nga Maqedonia dënimin me 15 vjet burg, të shqiptuar më parë nga Gjykata Regjionale për tentim vrasje. Viktima, një shqiptar nga Kosova ka shpëtuar nga vdekja por ka mbetur me pasoja të rënda shëndetësore, i lidhur tërë jetën për karrocën invalidore.

Krimi ka ndodhur në verën e vitit 2012, kur 29 vjeçari nga Maqedonia në afërsi të stacionit hekurudhor në Konolfingen të Bernës kishte qëlluar me armë zjarri kosovarin për shkak të borxhit që ky i fundit i kishte. Një borxhli tjetër të cilin ai po ashtu e kishte qëlluar kishte arritur të ikte dhe kishte shpëtuar pa lendime, shkruan derbund.ch.

Dorasi kishte ushtruar ankesë në gjykatën e lartë me pretendimin se aktin e ka kryer në një moment të dëshpërimit të thellë, transmeton albinfo.ch. Sipas avokatit të tij, një dënim prej më së shumti 10 vitesh burg do të ishte masa adekuate për veprën e klientit të tij.

Por nga ana tjetër prokurori kishte kërkuar 18 vjet burg për tentim vrasjeje. Sipas tij, dorasi kishte vepruar me gjakftohtësi dhe në mënyrë të paskrupullt.