140 vjet nga Lidhja Shqiptare e Prizrenit

Teksti, muzika dhe interpretimi : Demir Krasniqi –

O, në Prizren burrat e dheut ,
Të gjithë nipat e Skënderbeut ,
Vunë detyrat para veti ,
Që u dridh mali e deti ,
Të mundohen me shpirt në dhëmbë ,
Të robëruarit të çohen n’ këmbë ,
Që njëherë e përgjithmonë ,
Ta shohë dritën populli i jonë ,
Mos t’ sundojë as cari , as krajli,
Të lulëzojë fusha dhe mali –
Ta shoh dritën dhe shqiptari !

O, kështu nga zemra e Shqipërisë ,
Dhe nga kreshtat e malësisë ,
Nga Kosova e Kalabria ,
Si nga jugu e Çamëria ,
Si nga veriu e gegëria ,
Doli zëri nga mileti ,
Që u trondit n’ Stamboll dhe mbreti ,
Në Prizren , n’ atë 10 Qershori ,
Lidhja jonë , o, jehonë mori ,
U lidh besa n’ këtë malësi –
Të luftohet për liri !

O, lidhi besën krejt Ballkani –
Të largohet nga këndej Sulltani !
Abdyl beu po na thërret –
T’ rrokim armët dhe këtë vjet ,
Si shqiptarët që e kanë adet ,
Të luftojnë për vend të vet !
Në Kosovë e Dukagjin –
Zija Prishtina po na prinë .
Mic Sokoli n’ Kaçanik –
Të gjithë turqve iu duel në pritë ,
Me iu marrë f’tyrën , me i koritë !…

O, Vreton, Vason e Sulejmanin –
Therë në sy i kish Sulltani !
Sami beu dhe Naimi –
Si luaj me zemër trimi .

Iliaz pasha nga Radika –
Nuk e trembë as pushka , as thika !
Luftoi n’ shkrepat që i pat’ Dibra –
Emri i tij mbet në shumë libra !…

O, sot këto libra i shfletojmë –
Rilindësit i kujtojmë ,
Këngë e vjersha iu kushtojmë ,
I kujtojmë me krenari ,
Që kanë hy në histori ,
Që kanë ra n’ altar t’ lirisë –
Kanë rritë famën gjithë Shqipërisë !
Hapën rrugë internacionale ,
Që i kanë rrënjët ndër këto male ,
Vepra e tyre për atdhe –
U hap në botë si rrufe ,
I dha dritën vegjëlisë ,
E hej, po, tregoi rrugën – o ,
Haj, more , të lirisë – e !…

***** Kjo këngë në formë rapsodike është këndua , incizua dhe transmetua përmes valëve të Radio Prishtinës, me rastin e 100 – vjetorit të Lidhjes Shqiptare të Prizrenit, nga i njëjti autor dhe kompozitor.
Po ashtu, kjo këngë është botua edhe në librin e kantautorit Demir Krasniqi: ”Mallëngjime e ushtima” në Gjilan, më 1993, faqe 118 nr. 75 .