14 Qershori, Dita e komunës së Vitisë do të shënohet me një varg aktivitetesh

Viti – Është mbajtur sot mbledhja e këshillit Organizativ për shënimin e 14 Qershorit –Ditës së Çlirimit të Komunës. Me këtë rast zv.kryetari i komunës Hasan Aliu ka theksuar se kjo është një ditë e rëndësishme për qytetarët e komunës së Vitisë dhe kjo do të shënohet me një varg aktivitetesh kulturore e sportive.

“14 qershori është ditë e unifikimit të faktorit politik dhe qytetarëve të komunës sonë, pasi kjo ditë është dita e çlirimit që i parapriu edhe pavarësisë së Kosovës dhe si e tillë na obligon që të gjithë të jemi të bashkuar e ta shënojmë sa më mirë këtë datë të rëndësishme të kalendarit historik të komunës sonë”, ka thënë Aliu.

Në këtë takim të këshillit ishin prezent edhe kryesuesi i kuvendit Naim Pira, përfaqësues të Organizatave të dala nga Lufta, përfaqësues nga shoqëria civile etj./rajonipress/