RCCOLA

110 milionë euro mallra të kontrabanduara nga Serbia

/ 2 minuta lexim

Shifrat e importit dhe eksportit të mallrave nga Serbia në Kosovë dhe anasjelltas kanë shpërputhje të mëdha.Eksporti i regjistruar nga autoritetet serbe në Kosovë figuron dukshëm më i madh se sa që regjistrohet si import nga Doganat e Kosovës.

Kjo shpërputhje e importeve nga Serbia, për shefin e Doganave të Kosovës, Naim Huruglica, ndodh për shkak të hyrjes së mallrave në mënyrë ilegale në Veriun e Kosovës.

“Autoritetet serbe e regjistrojnë mallin që hyn në Veri të vendit, ndërsa një gjë të tillë nuk mund ta bëjnë Doganat e Kosovës, pasi që hyn në mënyrë ilegale”, pohon Huruglica.

Fundamenti

Sipas Odës Ekonomike të Serbisë, gjatë vitit 2008 në Kosovë janë eksportuar mallra në vlerë prej 264 milionë euro, 258.5 milionë euro në vitin 2009, 300.8 milionë euro në vitin 2010, 284.3 milionë euro në vitin 2011 dhe 141.5 milionë euro deri në muajin gusht të këtij viti, apo 1.249 miliardë euro nga viti 2008 e deri më tani.

Ndërsa sipas zëdhënësit të Doganave të Kosovës, Adriatik Stavileci, gjatë vitit 2008 nga Serbia janë importuar mallra në vlerë prej 248 milionë euro, 209.5 milionë euro në vitin 2009, 256.5 milionë euro në vitin 2010, 251.7 milionë euro në vitin 2011 dhe 173.6 milionë euro gjatë periudhës janar-gusht të këtij viti.(zeri)