11 vite pa presidentin e FC Drita, Selami Osmani-Bezi, fjalë prekëse nga vajza e tij Bezi S.Osmani

Gjilan – Familja e ngushtë, sportistët, tifozët ‘Intelektualët’, e qytetarët e Gjilanit, sot përkujtojnë 11 vjetorin e ndërrimit të jetës të ish-presidentit të FC Dritës, Selami Osmani – Bezi, njëherit njëri ndër afaristët e humanistët më të mëdhenj që ka pasur qyteti i Gjilanit.

Selami Osmani – Bezi kishte një dashuri të pashtershme ndaj FC Dritës, i cili me këtë klub në epokën e tij bënte revolucion në futbollin e Kosovës.

Me shumë dinjitet e përmallim edhe pas 11 vitesh FC Drita dhe tifozët e flakët ‘Intelektualët’, theksojnë se Selami Osmani-Bezi ishte ai që i bëri krenar dhe i bëri me identitet, pasi nuk kurseu as shëndetin e tij për të mirën e FC Drita.

Selami Osmani – Bezi ishte një afarist i njohur në Rajon, ai përpos FC Dritën që e qoi në piedestalin më të lartë në futbollin e Kosovës, ai ishte një humanist me përmasa të gjëra duke i ndihmuar çdo klubi që kishte nevojë, poashtu edhe qytetarët të cilët kishin hallet e tyre mbështetjen e gjenin tek Selami Osmani-Bezi, i cili gjithmonë ju dilte në ndihmë këtyre familjeve me nevojë.

Pas 11 vitesh të ikjes së tij në amshim edhe sot me shumë respekt e dashuri Selami Osmani-Bezi përkujtohet nga shumë sportist e qytetarë, duke e falënderuar përulësisht për kontributin e dhënë gjatë jetës së tij.

Në përvjetorin e 11-të të vdekjes, vajza e tij, Bezi S. Osmani, e kujtojë atë me shumë fjalë prekëse.
“E di që nuk jemi të detyruar nga përkufizimi i kohës dhe hapësirës, kështu që derisa të takohemi përsëri do të mbaj gjithmonë në zemrën time. Ishe Superheroi im, mentori im dhe miku im më i mirë, ju kujtoheni gjithmonë me shumë dashuri”./rajonipress/