​Mustafa akuzon Vulinin për diskurs shqiptarofob

Kryetari i Këshillit Nacional Shqiptar në Luginën e Preshevës, Ragmi Mustafa ka reaguar pas paralajmërimeve se Aleksandar Vulin do të emërohet ministër i Brendshëm i Serbisë, duke thënë se një qeveri s’mund të quhet pro-evropiane nëse ministri i saj krenohet se fyen publikisht dhe ushqen diskurs shqiptarofob.

Ai në një postim në Facebook ka shkruar se ministrat e tillë vetëm dëshmojnë mungesën e kapaciteteve demokratike të Serbisë institucionale, si parakusht për bashkëpunim dhe avancim të të drejtave të pakicave kombëtare.

Postimi i plotë:

Mandatarja për postin e kryeministres së Qeverisë së re të Serbisë, Ana Bërnabiq, paska propozuar Aleksandër Vulin për ministër të brendshëm.

Nuk mund të jetë pro-evropiane një qeveri që ministri i saj i policisë krenohet se fyen publikisht pakicat kombëtare dhe që ushqen vazhdimisht diskurs ksenofob e shqiptarofob.

Kjo nuk maskohet e zbukurohet me themelime të ministrive për të drejtat e njeriut, minoritete dhe dialog shoqëror.

Ministrat e tillë vetëm dëshmojnë mungesën e kapaciteteve demokratike të Serbisë institucionale, si parakusht për bashkëpunim dhe avancim të të drejtave të pakicave kombëtare.

Ky propozim për ministër të brendshëm vërteton konstatimin e Raportit të Progresit të BE për Serbinë lidhur me mungesën e respektimit të të drejtave themelore të të drejtave të njeriut e pakicave, shprehjes së lirë dhe sistemit “autokrat zgjedhor”.

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).